شلون ليلة عليه مرت

[محب الأئمة]

كندا/اتاوا - 1995



شلون ليله أعليه مرت ما شفت ليله مثلها

ليلة احزان ومصايب زينب توادع اهلها

* * *

اشلون ليلة اعلية مرت ساهرت منها الليالي

ليلة مـامرت مثلها ودّعـت عزي ودلالي

والخدر ذالك العرفته راح كله ومـا بگالي

بس هظم وآلام دهري ودمعة احزاني أهِلها

* * *

زينب وي الليه تحچي طولي يـا ليله عليه

لا يطر صبحچ يـليله ولاتـراوين المنيـه

خلّي ياليله وي اخوتي اسهر واگضي المسيه

خايفه مـن صبح باچر زينب تضييع شملها

* * *

ليله هاي احلي الليالي ليله اگضيها وي اخوتي

وليلة الحادي عليه ليلـه صعبه وبيها مـوتي

حيث بيها الخدر والعز ينهتك ينسمع صوتي

تالي زينب بعد عزها تنغدر ويمـوت املها

* * *

اشلون ليله بيها بـاچر لو لفه وبيّن فجرها

تهجم العسكر اعلينه وينسلب زينب خدرها

والحرم واطفالي كلها بالحرب تفگد ذخرها

باچر يهجمون بيتي لوگضوا بالطف أهلها

* * *

من لفه الليل اعلى زينب بكربلا وخيّم ظلامه

طلعت المظلومه تبچي تعنت اخيام الامـامه

طبت لخيمة اخوها والگلب يلهب ضرامـه

خويه انصارك تگلّه خايفه اتخون إبطلها

* * *

حسين لمن شاف زينب تشتچي وخايف گلبها

گلها يا زينب اطمنچ تحبني انصاري واحبها

وهذي انصاري يزينب عاهدتني اتطب حربها

تبرعت ليّه بـدماها صادگه وتـوفي بفعلها

* * *

واني اوصيچ بوصيه سمعي يا زينب وصيتي

بالحرم اوصيچ يختي وباليتامه واهـل بيتي

وبالصبر اوصيچ زينب لو دنت باچر منيتي

باچر العدوان يختي تحرگ الاطناب كلها

* * *

وباچر العباس يوگع عالشريعه يگطعونـه

اچفوفه باچر يگطعوها وبالسهم نتطفي اعيونه

يختي ويذبحون الاكبر والابو خابت اضنونه

يختي والعريس يختي هـامته بـدمّه غسلها