سيادة الريس ارجع لنا.. وكُل بطاطس مسرطنة

[لطيفة]

الأربعاء, 20 أبريل 2011




كتبت-هبة عبد الهادى:


نشرت مجموعة على الفيس بوك قصيدة طريفة, تحمل العديد من الأحداث الأخيرة قبل وبعد الثورة.

تبدأ القصيدة بـ"سيادة الريس ارجعلنا مش أنت واحد مننا"، ثم تسرد القصيدة مساوئ النظام البائد والشائعات التي تحدثت عن أن ثروة مبارك تبلغ 70 مليار جنيه, وقالوا له "عمرك فى يوم ما سرقتنا ولا خدت مليم مننا.. ما تيجى طب ترجع لنا ..بالمرة تاكل أكلنا".
وحدثوه عن الأمراض السرطانية التى انتشرت مؤخرًا وقالوا: "وغداك يا سيدى عندنا ..رز وبطاطس مسرطنة..لحمة مفيش من سنة.. فاكهة تعيش انت وانا".
وهذا جزء من القصيدة:



سيادة الرئيس ... ارجعلنا

مش أنت واحد مننا ؟؟ـ

و عمرك في يوم ما سرقتنا

***

ولا خدت مليم مننا

ما تيجي طب ترجعلنا

تقعد بأهلك وسطنا

أهو بالمرة تاكل أكلنا

وتلبس يا خويا من لبسنا

وتعيش في حارة أو في شارع زينا

قلت ايه ؟؟ يا حارق دمنا

***

سيادة الرئيس ... ارجعلنا

وغداك يا سيدي عندي أنا

رز و بطاطس مسرطنة

لحمة ؟؟... مفيش من سنة

فاكهة ؟؟... تعيش انت و أنا

و الشاي .. بآخر معلقة م السكر اللي كان عندنا

اشرب و فوق وركز بقه .. علشان نكمل حكينا

***

سيادة الرئيس ... ارجعلنا

مش سبت الحكم .. لأجلنا ؟؟ـ

ما تيجي تسمع حكمنا !!ـ

أفكرك ؟؟ ولا أنت فاكر زينا

قطر اتحرق من كام سنة

وغازنا اللي طار من أرضنا ... لعدونا

وعبّارة مللي بيغرقوا ..!! غرقت في عرض البحر و راحوا أهلنا ... و الجاني فلسع مننا

ومركبة بأحلى شباب ... ييجوا من ايطاليا غرقانين .. والقرش ياكل لحمنا

والله كانوا زينا

ويمكن أحسن مننا

ليهم بيوت وولاد و عيشة و حلم .. زي حلمنا

اتغربوا و اتبهدلوا .. لما الفساد طال كل حاجة في أرضنا

واللي ما ماتش .. قاعد في غربته .. والغريب بيذلنا

اقول كمان ؟؟ ولا كفاية ... و اهو انت عارف عننا

.

اصبر هتسمع حكمنا