على ناس وناس؟ قصة ابن الرئيس روزفلت !

[أمير الدهاء]

سميح القلاف

http://www.aldaronline.com/Dar/UploadAlDar/Author%20Pictures/sameeh.jpg


«ثيودور» كان أصغر اولاد رئيس أميركا روزفلت «سنة 1858-1919» وكان «ثيودور» وكيح وشيطان مأذي العالم ويوم من الإيام بعد ما أخذ «الليسن» وأبوه اشترى له سيارة أخذها مستانس يغز بالشوارع وماهو معترف بالرادار ولا الكاميرات ويمشي بسرعة جنونية، وكل انسان وهو بالشارع المقروض يتوقع الغير متوقع، لأن «ثيودور» انبط ناريره ولفت سيارته بعد ما فقد السيطرة عليها ودعم له شبة والله ستر مادعم سيارة فيها أوادم فرحانين بمشوارهم..

تسكرت الشوارع من الفضوليين وحضرت الشرطة ولانه مو متعور وودوه المخفر وبالمخفر ما عملوا له فحص نسبة الكحول بالدم وبعده تحول للمحكمة.. وقبل لا ينطق القاضي بالحكم وهو الحبس لمدة شهر وغرامة 1000 دولار، طلب «ثيودور» من القاضي السماح له بالاتصال بأبوه بالبيت الأبيض عشان يتوسط له ويخلصه من ورطته لانه ماشاف أحد فزع له من مجلس العموم.. ووافق القاضي «بعد ولد الرئيس».. وتم الاتصال وكلم «ثيودور» ابوه اللي اخذ يتسمع ليما انتهى.. وبعدها قال لولده عطني أكلم القاضي..


وتكلم الأب مع القاضي وقال له : «اسمع.. انت حكمت على ولدي بالسجن شهر وغرامة 1000 دولار وبما ان ولدي ما عنده سنت واحد من الألف وأنا رافض أدفع له هالمبلغ.. فاقترح انك تبدل الغرامة بالسجن».. ولاتعطيه التلفون يكلمني أو يكلم أي أحد وخاصة أمه.. وانتهى الحديث..

وابتسم القاضي ابتسامة ترس وجهه، وقال «لثيودور» اللي واقف نافخ نفسه ويقول يا أرض انهدي ما عليك قدي بعد أبوه الرئيس، وأكيد مسمع القاضي جم كلمة سمت عظمه، المهم كان منتظر يقول القاضي حنا آسفين ادعم الشبة الشبة هي اللي جت بطريقك وهي الغلطانة، ولكن القاضي قال له : اسمع يا ولد، أبوك طلب مني أشيل عنك الغرامة على شرط أبدلها بشهرين مع الشهر ويصيرون ثلاث اشهر تشرفنا فيها بالسجن..

انصدم الولد.. وهم يسحبونه للسجن.. وانتهت القصة اللي حدثت من زمان.. واللي الحمد لله نشوفها تتطبق عندنا كل يوم بالكويت بس بالعكس.. من يتصل ولد واحد عروق عائلته بالماي او يكون من رواد ديوانية عروقها بالماي ينهان الشرطي والمحقق وحتى فراش المخفر يصير.. بيزا.. ما يسوى.. هذا اذا ما طلعه ضابط المخفر أو واحد من المخفر يعرفه ويمكن يوصله البيت عشان خاطر أبوه اللي راح يسأله منهو اللي وقف معاك «عل وعسى» يحتاجه يوم..

واذا طلع الضابط نشمي وعاند وراحت الأوراق المحكمة الله يا كثر النجوم اللي تتراكض عشان تطم السالفة.. واذا هم ماكو فايدة وراح المحكمة يحكمه القاضي بغرامة مع وقف التنفيذ لان ما عندنا سجن للمرور سنع وحكم اقشر بالتوقيف يخيرونك سجن أو غرامة.. اشدعوة الغرامة بتسويه «هوم لس» القانون.. القانون لازم يطبق على الكل من غير واسطات مثل سالفة الفلبينية وديرتها.. وقبل لا أختم.. يقولون: واحد فقير حكمت عليه المحكمة بغرامة 500 دينار لأنه شتم القاضي وهو يؤدي وظيفته.

وقالوا له بالمحكمة عندك شي تبي تقوله للقاضي؟.. رد الفقير: صراحة عندي.. بس أخاف الفلوس ما تكفي..
tanateef9@yahoo.com