بوعمر يخاف ما يستحي

[زوربا]

بوشيخة - الدار


من كثر ما أسمع عن مقالاته الالكترونية.. وخزعبلاته الفكرية.. سألت احد الإلكترونيين من الربع عنه.. فقام وأهداني بواسطة الإيميل كل مقالات بو عمر.. ولأن وقتي أثمن من إني اضيعه على واحد ما يفتهم زود.. قريت بشكل موجز المقالات اللي اكتشفت ان الاساءه فيها لرموز الكويت والاسرة الحاكمة ممكن توديه ورا الشمس صج مو غشمرة.. واستغربت الصمت المطبق من هالناس عن هالمرجوج الأخبث..

ورجعت وتساءلت عن سبب توقفه عن هالكتابات في الوقت الحالي؟ فعرفت ان الرجل هذا اذا كان فحل يخاف بس ما يستحي.. باللهجة المصرية يخاف ما يختشيش.. وبلهجة أهل البحرين يتصرقع وماله حيا.. وصاحبنا أثبت انه الحيا آخر همه.. لكن الخوف ملازمه مثل ظله.. والدليل انه ما كتب شي ولا قال شي عن النظام رغم انتقاداته السابقة..

لأنه شاف العين الحمره على ربعه.. ناس مثل هالنوع ما تسوى ولا تستاهل نعطيها أكبر من حجمها.. واحد مثلك يا الدايخ وايد عليه يمشّون فيه الزفر.. ويخب عليه يكون محامي فاشل كل يوم وترك يفتح مكتب ويصكه.. أما سالفته العميه مع زهرة السوسن فهذي قصة راح اكتبها وأنا رايح البحرين بالسيارة.. اللي يحر انه مصدق عمره ونازل الانتخابات ومغير دائرته.. واحد مثله بدا حياته محامي سكة وتالي طرار عند الشيوخ وبعدين وصولي وبعدها مذيع تالي منظر ومفكر عقد الاطباء النفسيين.. لابد تكون نهايته قريبة.. ولأنه يخاف ما يستحي راح نخوفه بملف متروس أوامر صرف باسمه.. وصج لي قالوا الاوليين وجه ابن فهرة.

• كلمة راس
يقال والعهدة على الراوي انه مرشح بالدائرة الثالثة دنا زواله وراح ينكشف هاليومين بسبب شيكات قال عنها وتالي لحس كلامه.. المصيبة انه واحد مسجل له مكالمة يقول فيها (سالفة الشيكات كرت واحترق).
Boshi55a@hotmail.com

[فيثاغورس]

الهزبر ميزانه مايل

بوشيخة - الدار


لأن القنوات الفضائية كثرت بالديرة.. ساعات انسى وآخذ معاي الريموت كنترول الدوام.. لأني طول اليوم ماسك الريموت وانتقل من قناة لي قناة.. الظهر اتوهق بين بو عيده بسكوب وكلام صريح بالعدالة.. وساعات اشوف أخبار الديرة بقناة فلاش.. بعد الساعة ثمان الليل احط قناة الوطن اتابع الاخبار وارجع على الراي اشوف الاخبار العاجلة..

بعدها بساعتين يفتر راسي.. دقيقتين احمد الفضلي ثلاث دقايق اللوبي،

ومن ثم (اتعب على ومن ثم) ارجع حق بوفتين بنظارته الحلوة واسلوبه الشيق.. لا والله ارد مرة ثانية فلاش بعدها الراي بعدين العدالة .. لين اصير حول وانام.. وقبل امس خذت الجولة المعتادة على القنوات، وبالصدفة شفت الوطن حاطين ندوة محمد عبدالقادر الجاسم المرشح بالدائرة الثالثة.. هذا الهزبر.. الهمام.. فارس القلم.. حارس الديرة.. ملك الحبر..

ومن سوء حظه اني سمعته وشفته يقول ( لا يجب ان نطلق على التجار لقب الحيتان فهم اهل الكويت وقانون الاستقرار مفيد للجميع) تنحنحت وناديت شيّوخه وقلت لها هاتي لي ورقة وقلم..

وكتبت التالي: يوم ان التجار مو حيتان ليش ما تشيل سماعة التلفون وتتصل بنسيبك مسلم البراك وتقول له هالحجي؟

والا الموضوع تمثيل وتغيير أدوار؟ ويوم انك مقتنع ليش ما تكتب رايك بالجريدة والانترنت؟ وبعدين تعال من متى تختلف قناعاتك مع قناعات مسلم؟ الا اذا وراء الأكمه ما وراءها (بوشيخه خطير باللغة)

والا الموضوع فيه ان وكيف ومتى؟

اهي وحدة من الثنتين يا ان مسلم ما يطيعك ولا يدري عن هوا دارك عقب طلعتك من الوطن! او انك اتصلت فيه وقلت له .. واللي يسلمك بو حمود بخالفك بموضوع الحيتان علشان الاسهم اللي شريتهم بدينار وسبعمية وخمسين وبنزلة السوق صاروا بميتين واربعين فلس.. وهني حسابك بيكون عسير .. تكتب مقالات بالمنطقة الخضراء عن القيم والمبادئ وتكافؤ الفرص والديموقراطية والحريات.. وحاط لك ميزان بالانترنت، وكل اسبوع دابل جبودنا بالدولة ومساراتها وكيف ننهض وشلون نرتقي وآخرتها ميزانك مايل؟ تبي الصج.. توني عرفتك زين تلعب على الحبلين، غيرك يحب واحد وانت وهقت الاثنين..

• كلمة راس

زمن معكوس زمن منكوس زمن منتهي زمن مولي زمن فيه الذيل صار راس زمن فيه المريض نفسيا يداوي الناس.. هذا زمن بوعمر.

Boshi55a@hotmail.com