نصيحة للخائفين من الانسولين.. حسين البصري

[فاتن]

2020-11-30

كتب حسين البصري:

“دكتور عفية ما اريد تكتبلي انسولين ماريد اتعود عليه “

هاي العبارة بكل خفر اسمعهه ع الاقل مرة

الانسولين هرمون تفرزه بعض خلايا البنكرياس بشكل طبيعي بداخل الجسم من الولادة للوفاة .. يعني هو اساسا موجود بالجسم واحنا متعودين عليه

هذا الهرمون شغله من تصعد نسبة السكريات بالدم يزداد بالدم لان هاي السكريات ما تكدر تدخل للخلايا مال الجسم الا بمساعدة الانسولين .. يعني شغلة مثل الحملدار يوصل جزيئات السكر لمكانهه “داخل الخلايا” وثيمالاه

اذا قل الانسولين او صارت بي مشكلة ؟ ..

راح تبقى نسبة جزيئات السكر مرتفعه بالدم “بعد كل وجبة” ومتكدر تدخل للخلايا

يعني انته تحس نفسك جوعان وتاكل بشراهة بس الاكل يوصل للدم ويظل يفتر ميدري وين يروح وميكدر يدخل للخلايا الجوعانه

زين خلي يصعد شرايدين منه ؟

واذا صعد السكر ؟

اذا صعد السكر اكثر من الحد المقرر اله راح ممكن يخرب وحدات التصفية مال الكلى وممكن يترشح داخل العين مما يسبب ضعف النظر وربما العمى ..

وعالمستوى البعيد يأثر عالجهاز التناسلي ويؤدي للعقم .. وفشل الكلى وممكن يدخل الجسم بازمة خطرة جدا اسمهه الحماض الكيتوني السكري ..

ممكن يأدي للوفاة وشخصيا عدة شباب شفتهم توفوا بالمستشفى بهاي الازمة اللي اسمهه DKA

يعني من ناخذ الانسولين ..

فهو لاجل تعويض النقص اللي عدنا منه ..

ببساطة احنا لان متعودين عليه “لان هو موجود بشكل طبيعي بالجسم بس بسبب مرض السكر صار عدنا نقص بي او مشكلة معينه “لازم ناخذه اذا احتاجيناه مثل ما ناخذ الثايروكسين بعد ما نشيل الغدة الدرقية اللي تفرزه حتى نعوض النقص الحاصل منه ومثل ما ناخذ بطل دم بعد ما يصير عدنا نزيف حاد ونقص بالدم

والمشكلة ابو السكر ما يصير عنده اعراض لحد ما يطيح الفاس بالراس

ويجي نلگاه مأثر ع عيونه والكليتين والاعصاب ووو ..

ومن نكله ليش متاخذه يكول خاف اتعود عليه ..

[رستم باشا]

نريد تأكيد على كلام الدكتور !